QUEN SOMOS?
A Asociación Xuvenil Proxectando está formada por un grupo dinámico de mozos e mozas que procura darlle voz á mocidade carballesa para que decida por si mesma. Proxectando organiza actividades de ocio e formación orientadas á mocidade.
QUE OBXECTIVOS TEMOS?
1. Fomentar a participación da xuventude local na súa comunidade
2. Coñecer as necesidades desta mocidade local
3. Buscar recursos, desenvolver medidas e/ou proxectos para atender ás necesidades dos mozos e mozas da zona
4. Desenvolver proxectos no ámbito da partipación europea, como intercambios, bolsas no estranxeiro…
5. Realizar actividades (culturais, deportivas, lúdicas, formaticas, etc) de interese para a mocidade
QUE FACEMOS?
En Proxectando buscamos a participación e incidencia na sociedade, por iso todas as nosas actividades están orientadas ás necesidades reais e as inquietudes da nosa mocidade. Deportes, música, ocio, información académica e laboral, proxectos de intercambio europeo…, son tan só algúns ámbitos nos que traballamos desde e para a mocidade.
POR QUE TE PRECISAMOS?
Para que Proxectando poida levar a cabo as súas actividades precisamos de todo o potencial creativo dos mozos e mozas que queiran botar unha man. A única maneira de facerte oír é actuando, decidindo por ti mesmo.
EN QUE PODES AXUDAR?
Calquera mozo e moza de entre 14 e 30 anos pode formar parte da Asociación Xuvenil Proxectando. Como? Participando nas actividades, propoñendo outras novas, colaborando nos obxectivos propostos, axudando a que sexamos unha asociación dinámica e posta ao día en materia de xuventude, e outras moitas cuestións.
COMO CONTACTARES CON NÓS?
Entre as actividades principais da Asociación Xuvenil Proxectando está a creación e mantemento dunha páxina web que sirva de enlace entre a mocidade e nós. Con esta finalidade nace www.Proxectando.eu, onde podes atopar información actualizada sobre as nosas actividades e información útil sobre o teu día a día. Así mesmo, tes ao teu dispor o enderezo electrónico info@proxectando.eu, onde poderás poñerte en contacto con nós.
